Flugfreyjur í verkfall

Afgerandi meirihluti flugfreyja samþykkti um helgina verkfallsaðgerðir í atkvæðagreiðslu Flugfreyjufélags Íslands.

Á kjörskrá voru 498 og atkvæði greiddu 287. Já sögðu 276 eða 96,2 prósent og nei sögðu 11, eða 3,8 prósent.

Fulltrúar funduðu síðast í húsi Ríkissáttasemjara síðastliðinn miðvikudag en þegar hafa þeir hafnað samningi með almennri launahækkun upp á 2,8 prósent sem gildir til eins árs.

Ótímabundið yfirvinnubann flugfreyja tekur gildi næstkomandi sunnudag, 18. maí, klukkan sex að morgni. Fyrsta vinnustöðvun er boðuð 27. maí á milli klukkan sex að morgni til miðnættis. Náist samningar ekki hefur verið boðað til sólarhringsverkfalla 6. júní og 14. júní. Þá hefst ótímabundið verkfall 19. júní.

Flugfreyjufélag Íslands samanstendur af um það bil sjö hundruð félagsmönnum sem starfa hjá Icelandair, WOW air og Flugfélagi Íslands. Aðgerðirnar beinast eingöngu gegn Icelandair.