Íslendingar minnst frá vegna veikinda á Norðurlöndunum

Aðeins 1,7 prósent Íslendinga sem eru í vinnu voru fjarverandi vegna veikinda, í viku eða meira í fyrra. Það er lægsta hlutfallið á Norðurlöndum. Mestar voru fjarvistir vegna veikinda í Noregi eða 3,5 prósent.

Þetta kemur fram í Norrænum hagtölum, sem komu út í dag.

Á eftir Norðmönnum koma Finnar með 2,6 prósent og Svíar eru í þriðja sæti með 2,3 prósent.

Þá kemur fram að veikindafjarvistir kvenna séu almennt meiri en karla, en íslenskar konur séu, ásamt þeim dönsku, með minnstar fjarvistir. Af þeim höfðu 1,7% verið fjarverandi vegna veikinda í meira en eina viku árið 2013. Norskar konur eru efstar með 4,3%. Næst þeim koma finnskar og sænskar konur með 2,9%.