KSÍ sleppur ekki undan FH í dómsalnum

Kröfu KSÍ um að vísa frá innheimtumáli FH á hendur sambandinu hefur verið hafnað. Málið verður því rekið áfram í dómsal þar til niðurstaða fæst. Um er að ræða 700 þúsund króna kröfu FH á hendur KSÍ vegna meintrar misnotkunar á aðgangspössum KSÍ.

Stefna FH er tilkomin þar sem menn þar á bæ telja að misnotkun á úthlutun þessara passa hafi orðið til þess að félagið missti af tekjum og vill félagið fá þær tekjur til baka.

„Ég get ekki sagt að það komi mér á óvart að frávísun KSÍ hafi verið hafnað. Þeirra rök voru að fjalla ætti um málið á vettvangi KSÍ og kærðu okkur fyrir að stefna þeim til aga- og úrskurðarnefndar KSÍ. Sú kæra hefur legið þar í margar vikur en ég var alltaf viss um að lög KSÍ væru ekki ofar lögum landsins þótt sumir aðrir héldu greinilega annað,“ segir Jón Rúnar Halldórsson, formaður knattspyrnudeildar FH, í samtali við Vísi.

Aðspurður um hvenær aðalmeðferð í málinu fari fram segist Jón Rúnar ekki vita það en býst þó við að það verði fyrr frekar en seinna.