FH stefnir KSÍ og krefst 700 þúsund króna

Knattspyrnudeild FH hefur stefnt Knattspyrnusambandi Íslands (KSÍ) og krefst þess að fá 700 þúsund krónur greiddar frá sambandinu. Málið snýst um meinta misnotkun á aðgangspössum KSÍ.

KSÍ gefur út svokallaða A-passa á hverju ári en þeir veita frítt aðgengi að knattspyrnuleikjum á Íslandi. Skýrt er kveðið á um í reglugerð hverjir fá slíka passa en meðal handhafa þeirra eru stjórnar- og nefndarmenn KSÍ og knattspyrnudómarar.

Stefna FH er tilkomin þar sem menn þar á bæ telja að misnotkun á úthlutun þessara passa hafi orðið til þess að félagið missti af tekjum og vill félagið fá þær tekjur til baka. Jón Rúnar Halldórsson, formaður knattspyrnudeildar FH, segir í samtali við Vísi, að hann hafi lengi bent á þessa misnotkun en talað fyrir daufum eyrum. Hann hafi því tekið sig til, greint nafnalista yfir handhafa A-passanna og komist að því að um 40 einstaklingar á listanum uppfylltu ekki skilyrði fyrir að fá úthlutað passanum.

„Ég sendi KSÍ bréf þar sem sambandinu voru gefnir tveir kostir. Að afturkalla þessa passa eða borga fyrir aðgengi þessa fólks. Ég fékk svar í þá áttina að mér kæmi þetta ekki við. Þá var ekki annað í stöðunni en að senda sambandinu reikning upp 700 þúsund krónur fyrir aðgengi þessara 40 einstaklinga á ellefu heimaleiki FH síðastliðið sumar. Þeim reikningi var hafnað í tvígang og því var það sent í innheimtu. Og nú er málið komið fyrir dómstóla,“ segir Jón Rúnar.

Aðspurður hvort þetta sé hluti af valdatafli milli hans og forystu KSÍ segir Jón Rúnar svo ekki vera. „Þetta er prinsipp- og innheimtumál. Ekkert annað. KSÍ getur ekki verið að bjóða hverjum sem er í partý til mín. Ég vil hafa eitthvað um það segja hverjir koma í mín partý,“ segir Jón Rúnar og bætir við að verið sé að vanvirða þessa passa með því útdeila þeim til hvaða jólasveina sem er.

Geir Þorsteinsson, formaður KSÍ, segir í samtali við Vísi að hann sé sorgmæddur yfir þessum málatilbúnaði. „Við höfum unnið þessi mál í góðri sátt við aðilarfélögin og þessi úthlutun byggir að einhverju leyti á hefð,“ segir Geir. Aðspurður um hvort hann óttist að mögulegur dómur FH í hag hafi fordæmisgildi og að sambandið fái í kjölfarið yfir sig holskelfu af reikningum frá hinum ellefu liðum Pepsi-deildarinnar segir Geir svo ekki vera. „Ekkert annað félag innan okkar vébanda hefur gert athugasemdir við úthlutun þessara passa.“