Friðrik og Friðrik útskrifast saman úr Harvard

Nafnarnir Friðrik Árni Friðriksson Hirst og Friðrik Ársælsson útskrifuðust á fimmtudaginn úr lagadeild Harvard. Þeir útskrifuðust úr LLM-námi, sem er framhaldsnám fyrir lögfræðinga, með hæstu einkunn í flestum áföngum.

Þeir eru sammála um að námið hafi verið krefjandi og þó nokkuð frábrugðið háskólanámi á Íslandi. „Hér er minni áhersla lögð á lokapróf og að reyna að hanka mann á smáatriðum. Það er frekar ætlast til að maður skilji stóra samhengið,“ segir Friðrik Árni.

Nafni hans bætir við að nemendur þurfi alltaf að vera á tánum. „Kennarar spyrja reglulega af handahófi og þá þarf maður að vera tilbúinn með svar sem heldur vatni.“

Góð vinátta tókst á milli þeirra. „Við bjuggum í sömu götu í Cambridge. Konur okkar urðu góðir vinir og við eigum börn á sama aldri,“ segir Friðrik Ársælsson.

Hann bætir við að það hafi komið á óvart hversu fjölbreyttur nemendahópurinn hafi verið. „Þarna voru yfir 180 nemendur frá 80 löndum. Besti vinur minn var frá Gana, það var ekki eitthvað sem ég bjóst við áður en ég fór út.“