Sveinbjörg Birna segist hafa staðist prófið

„Það er gaman að sjá þessar tölur. Þetta er eins og ég sé búin að fara í próf og ég náði,“ segir Sveinbjörg Birna Sveinbjörnsdóttir, oddviti Framsóknarflokksins og flugvallarvina, í snörpu samtali við Vísi.

Hún segist samt taka þessum fyrstu tölum af yfirvegun. „Já, ég tek þessu bara af stóískri ró. Ég er mjög róleg yfir þessu.“ Hún bendir líka á að aðeins hafi verið talið 10 prósent atkvæða, en viðurkennir að ef þetta væri skoðanakönnun væri það stórt úrtak.

Sveinbjörg bíður eftir fleiri tölum, en Framsóknarflokkurinn er ekki langt frá því að ná öðrum manni inn í borgarstjórn, sem yrði ótrúlegur sigur sé miðað við stöðuna í skoðanakönnunum stuttu fyrir kosningar.