Frambjóðandi vaknaði upp við sprengingar í garðinum sínum

Fanney Birna Jónsdóttir skrifar 1. júní 2014 14:01

Ingibjörg biðlar til þeirra sem gerðu þetta að stíga fram.

„Svo var það klukkan 4 í nótt sem við vöknuðum upp við flugelda í garðinum okkar og þegar við litum út þá var búið að líma eitt stykki flugeld við trampólín barna okkar.

Ég verð að segja að mér varð töluvert brugðið. Þegar fólk er farið að nota leikföng barna minna til að fagna niðurstöðum kosninga og þá greinilega verið að persónugera hluti. Það segir mér enginn að það sé tilviljun að einhver rambi inní garðinn minn, oddvita Samfylkingarinnar, til að sprengja flugelda. Þetta var dropinn sem fyllti mælinn,“ skrifar Ingibjörg Valdimarsdóttir, oddviti Samfylkingarinnar á Akranesi á Facebook síðu sína.

Hún segir þau hjónin hafa komið heim eftir kosningavöku í nótt og orðið þess var að hvítur Audi jepplingur lá á flautunni þegar hann nálgaðist húsið þeirra.

„Okkur fannst þetta afar undarlegt að fólk skuli haga sér svona þegar klukkan að ganga 2 að nóttu til en hristum bara hausinn og hugsuðum svo sem ekki meira um það,“ skrifar Ingibjörg.

Þau vöknuðu síðan eins og áður segir klukkan fjögur við „gríðarlegar sprengingar“ frá flugeldnuum en trampólín barnanna stendur fyrir utan svefnherbergisglugga þeirra hjóna. Samkvæmt eiginmanni Ingibjargar, Eggerti Herbertssyni vaknaði allt hverfið.

„Við hrukkum bara upp af værum svefni og héldum að eitthvað væri að springa en áttuðum okkur fljótlega að þarna væri um flugelda að ræða en okkur datt nú ekki í hug að þeir væru í garðinum okkar,“ segir Ingibjörg í samtali við Vísi. Hún segir að þeim hafi verið verulega brugðið.

Þau hjónin tilkynntu atvikið til lögreglu.

„Ég [...] vona svo sannarlega að þetta endi hér með því ef fólk er farið að persónugera svona bæði með persónulegu skítkasti og árásum á heimili fólks þá endar það þannig að enginn er tilbúinn að starfa fyrir bæinn okkar. Ég tek það þó fram að ég mun ekki láta þetta brjóta mig niður heldur eflir þetta mig frekar að berjast gegn svona vitleysingum,“ skrifar Ingibjörg.

Hún auglýsir að lokum eftir þeim sem gerðu þetta og biður þá að stíga fram. Þá biður hún þá sem urðu varir við mannaferðir í kringum hús hennar um þetta leyti í nótt að láta sig eða lögregluna vita.

Mest lesið

Fleiri fréttir