Þjálfari Arons hjá IMG: Sá strax að hann hafði hæfileika

Aron Jóhannsson, framherji AZ Alkmaar og bandaríska landsliðsins, var í ítarlegu viðtali við sérstakt HM-blað tímaritsins Howler Magazine.

Í viðtalinu ræðir Aron m.a. um dvöl sína í Bandaríkjunum veturinn 2007-08 þegar hann var við nám í IMG-íþróttaháskólanum í Bradenton í Flórída, en þar gefst ungu og efnilegu íþróttafólki kostur á að æfa eins og atvinnumenn meðfram náminu.

Margir þekktir bandarískir fótboltamenn hafa gengið í skólann í gegnum tíðina. Má þar m.a. nefna Landon Donovan, Freddy Adu, Jonathan Spector, Oguchi Onyewu, Jozy Altidore, DaMarcus Beasley og Michael Bradley, en þeir þrír síðastnefndu eru í leikmannahópi Bandaríkjanna á HM ásamt Aroni.

"Það er á menntaskólaárunum sem flestir byrja að drekka, reykja og djamma um helgar," sagði Aron við Howler.

"Ég vildi helst losna við það og einbeita mér að fótboltanum. Það er nánast alltaf sama rútínan hjá IMG. Þú vaknar, ferð í skólann og ert þar til klukkan eitt, þangað til þú ferð á æfingu," segir Aron sem kynntist lífinu í IMG fyrst þegar hann var 15 ára, en þá æfði hann þar um vikutíma.

Þjálfarinn Tom Durkin hreifst þá mjög af Aroni og hvatti foreldra hans til að skrá hann í skólann.

"Ég sá strax að hann hafði hæfileika," segir Durkin í viðtalinu. "Hann hafði góða skapgerð, en hann var ekki sá duglegasti. Ég held að hann hafi ekki þurft að vinna fyrir öllu á Íslandi, því hann var einn af betri leikmönnunum þar. Hjá IMG leggjum við áherslu á að fólk leggi hart að sér."

Aron var aðeins einn vetur í IMG, en hann kom aftur til Íslands árið 2008 og lék með Fjölni næstu þrjú árin áður en hann samdi við danska liðið AGF.

"Að snúa aftur til Íslands var það besta sem gat komið fyrir Aron," segir Durkin. "Hann kom aftur heim og hann vann sér sæti í Fjölnisliðinu sem hann hefði eflaust ekki gert áður."