Er bara ég sjálf

Sara Pétursdóttir kom, sá og sigraði Söngkeppni framhaldsskólanna. Hún lærir hárgreiðslu í Tækniskólanum og hefur einstakan stíl.



Hvenær kviknaði tískuáhuginn?

Ég byrjaði fyrir alvöru að spá í tísku þegar ég varð sextán ára; í upphafi menntaskólaáranna.

Hvernig myndirðu lýsa eigin stíl?

Ég hef minn eigin stíl og hef að markmiði að líta ekki út eins og allir aðrir.

Hvaðan hefurðu tískuvitið?

Ég er dugleg að skoða tískublöð og nota Pinterest mikið.

Áttu þér uppáhaldstískuverslanir?

Já, Topshop og Spútnik eru í mestu dálæti.

Eyðir þú miklu í fatakaup?

Já, ég eyði eiginlega mestu eingöngu í föt.

Hver er þinn helsti veikleiki þegar kemur að tísku?

Ég er svo óeðlilega lappalöng að það er varla mögulegt að finna á mig nógu síðar gallabuxur.

Hvað yrði fyrir valinu ef þú mættir kaupa þér eina nýja flík í dag?

Fallegur kjóll úr Spútnik.

Hvaða litur klæðir þig best?

Ég hugsa að dökkgrænn fari mér best.

Áttu þér uppáhaldsflík?

Já, ég held mikið upp á gamlan jakka frá ömmu.

Hverju klæðistu við sparileg tilefni?

Þá fer ég í fallegan kjól eða sæta skyrtu.

Ertu hrifin af skartgripum?

Mér þykir óþolandi að vera með armbönd en í lagi að vera með hringi. Hálsmen eru hins vegar ómissandi og helst vil ég hafa þau í stærri kantinum.

Hvaða ilmvatn notar þú?

Ég nota aðallega ilmvötn frá Beyoncé og þykir þau langbest.

Hvaða einn hlutur er ómissandi í snyrtibuddunni?

Varalitur. Ég get ekki án hans verið.

Hvað er það besta við sumartískuna?

Frelsið til að leika sér með litasamsetningar og skærir litir sem gera allt svo sumarlegt.

Áttu þér tískufyrirmynd?

Nei. Ég er bara ég sjálf. Tíska fyrir mér er föt sem mér sjálfri þykja flott; burtséð frá því hvað öðrum finnst.

Hvaða söngkona á heimsvísu er best klædd að þínum dómi?

Breska söngkonan Adele. Hún reynir hvorki að sýna neitt né vera önnur en hún er. Adele er einfaldlega algjört æði og í fáránlega flottum fötum.

Hvers vegna ákvaðstu að læra hárgreiðslu?

Ég hef lengi haft gaman af því að fikta í hári og langaði að prófa að nota listræna hæfileika mína í einhverju öðru en söng, teikningum og dansi.



Lumarðu á góðu fegrunarráði fyrir hárið?

Mikilvægast er að halda hárinu heilbrigðu og sem mest náttúrulegu. Hár er alltaf langfallegast eins og það er.

Kjóll eða buxur?

Buxur. Þær eru einfaldlega þægilegastar.

Einlitt eða munstrað?

Einlitt. Munstrað getur orðið of mikið þótt það sé líka stundum flott.

Háir hælar eða flatbotna skór?

Flatbotna. Þeir fara betur með fæturna og tryggja þeim meiri vellíðan.