Leita að kattafjölskyldu við nágrenni Esjunnar

Læða og kettlingar sáust í trjálundi í hlíðum Esjunnar í síðasta mánuði. Göngufólk sá kettina og höfðu samband við Kattholt en kettirnir hafa ekki sést síðan. Þetta kemur fram á vefsíðu Kattholts en þar segir að starfsmenn hafi svipast um á svæðinu í kjölfar símtalsins og skilið þar eftir kattafóður. Þó segir að ekki sé hægt að útiloka að önnur dýr, til dæmis mýs, muni stelast í fóðrið.

Læðan er hvít og bröndótt, líklega heimilisköttur, en kettlingarnir gætu verið fæddir á svæðinu. Starfsmaður Kattholts sagði í samtali við Vísi að Esjan væri ekki staður fyrir vegalaus dýr og eru því allir þeir sem telja sig hafa séð kettina beðnir um að hafa samband við Kattholt í síma 567-2909.