Skólar keppa í orkusparnaði

Stóru norrænu loftslagsáskoruninni var hleypt af stokkunum með opnunarhátíð í Síðuskóla á Akureyri. Verkefnið er keppni milli skóla á Norðurlöndunum í að minnka rafmagns-, vatns- og hitanotkun í skólunum ásamt því að leysa verkefni tengd sjálfbærni og loftslagsmálum.

Markmiðið er að fræða nemendur um umhverfismál á áhugaverðan og skemmtilegan hátt. Viðamikil námsgátt hefur verið hönnuð í tengslum við verkefnið þar sem bæði kennarar og nemendur geta nálgast fjölbreytt námsefni um loftslagsmál, orkunotkun og sjálfbærni. Þá gefur vefurinn nemendunum kost á því að koma á sambandi við jafningja sína annars staðar á Norðurlöndum. 

Síðuskóli er fyrsti íslenski skólinn sem tekur þátt í verkefninu. Opnuninni var valinn staður þar sökum metnaðarfullrar umhverfisstefnu skólans í rekstri og kennslu.

Keppninni lýkur 23. mars á næsta ári.