Fjármagna framkvæmdir til að hindra gjaldtöku

Hið opinbera hefur ákveðið að veita fjörutíu milljónir króna til gerðar göngustígs og nýs útsýnispalls við Dettifoss að vestanverðu. Þetta setur strik í áform landeigenda sem vilja taka gjald af ferðamönnum sem heimsækja svæðið, meðal annars til að fjármagna uppbyggingu göngustíga og útsýnispalla.

Fjármunirnir sem hið opinbera hefur nú veitt í þetta verkefni koma úr framkvæmdasjóði ferðamannastaða og fara í að byggja 100 fermetra útsýnispall og 260 metra göngustíg.

Hjörleifur Finnsson, þjóðgarðsvörður Vatnajökulsþjóðgarðs, telur að með þessu verði fyrirhuguð gjaldtaka landeigenda ómöguleg.

„Útsýnispallurinn og göngustígurinn eru í landi þjóðgarðsins. Það verður erfitt að rukka fyrir göngustíg sem er að hluta til í ríkiseigu og að hluta til í einkalandi.“ segir Hjörleifur.

„Ef gjaldtökuhugmyndir landeigenda standast lög, sem ég efa, þá neyðumst við til að byggja nýjan göngustíg alfarið í okkar landi. Eðlilegast væri þó ef núverandi vegstæði yrði notað áfram. Þannig myndu útsýnispallurinn og bílastæðið tengjast best,“ segir hann.

Á heimasíðu Landeigendafélags Reykjahlíðar, sem nær frá Námaskarði að Dettifossi, eru rökin fyrir gjaldtöku sögð að vegna ágangs ferðamanna þurfi að vernda náttúruna og byggja upp göngustíga og útsýnispalla.