Grunnskólanemar styrkja Klepp

Nemendaráð Ölduselsskóla afhenti í gær Kleppsspítala sjötíu þúsund krónur sem söfnuðust á vorhátíð skólans. Nemendurnir áttu sjálfir frumkvæðið að söfnuninni eftir að þeir fengu kynningu á starfsemi spítalans í vetur.

„Árgangurinn okkar fór í kynningar upp á Klepp,“ segir Hugrún Egla Einarsdóttir, gjaldkeri nemendaráðsins. „Þetta var ótrúlega áhugavert og okkur langaði að safna og gera eitthvað fyrir þau.“

Það var Thelma Dögg Valdimarsdóttir, sjúkraliði á öryggisgeðdeild og móðir nemanda í Ölduselsskóla, sem hóf að kynna starfsemina á Kleppi fyrir grunnskólanemum.