„Þetta er dálítið magnað, þótt ég segi sjálfur frá“

Engir leikarar taka þátt í sýningu sem frumsýnd verður í Borgarleikhúsinu á Listahátíð í Reykjavík í kvöld. Hún samanstendur einungis af leikmynd, ljósum og tónlist.

Verkið er drifið áfram af magnaðri tónlist Kjartans Sveinssonar og leikmyndum Ragnars Kjartanssonar og hlaut sýningin mikið lof í Berlín í vetur. Tónlistin er flutt af 40 manna sinfóníuhljómsveit og kór.

Ragnar segir verkið byggja á fegurðarþránni. „Titillinn var sóttur í Heimsljós, í kraftbirtingarhljóm guðdómsins og þetta heitir upp á þýsku „Der Klang der Offenbarung des Göttlichen“,“ segir hann.

Hugmyndin kviknaði þegar Ragnar vann sem sviðsmaður í Þjóðleikhúsinu og gantast var á tæknirennslum með að sýningar væru betri án leikaranna. „Þannig að þetta er í rauninni gamall sviðsmannabrandari sem er orðinn að veruleika.“

Verkið er uppfullt af rómantík. „Það er verið að sækja í þessi rómantísku fegurðarminni, ægifegurð. Þetta er ekki rólegt og rómantískt heldur svona ofsafengin rómantík,“ segir Ragnar.

Aðeins þrjár sýningar eru á dagskrá. „Þannig að komiði endilega því ég get alveg lofað því að þetta er dálítið magnað, þótt ég segi sjálfur frá,“ segir hann að lokum.

Nánari upplýsingar má finna hér.