Vopnfirðingar sjá áfram um rekstur Sundabúðar

Kristján Þór Júlíusson heilbrigðisráðherra og Ólafur Áki Ragnarsson, sveitarstjóri Vopnarfjarðarhrepps, undirrituðu fyrr í dag endurnýjaðan samning sem felur í sér að Vopnafjarðarhreppur mun áfram sjá um rekstur hjúkrunarheimilisins Sundabúðar og heimahjúkrunar í sveitarfélaginu.

Í tilkynningu frá velferðarráðuneytinu segir að einnig hafi verið veitt heimild fyrir rekstri eins dagdvalarrýmis í húsnæði Sundabúðar.

„Upphaflegur samningur um þetta efni var gerður fyrri hluta árs 2013. Áður hafði rekstur hjúkrunarheimilisins verið á hendi Heilbrigðisstofnunar Austurlands. Með þessu samningi er áhersla lögð á eflda þjónustu í heimabyggð og aukin verkefni til sveitarfélaganna. Jafnframt er sérstaklega horft til þeirra tækifæra sem í þessu felast til að samþætta þjónustu við aldraða íbúa sveitarfélagsins,“ segir í tilkynningunni.

Samningurinn gildir til ársloka 2015.