Tíu brennur í Reykjavík á gamlársdag

Eldur verður borinn að köstunum klukkan 20:30 á gamlárskvöld á öllum stöðum á öllum áramótabrennunum í Reykjavík nema einum. Á Úlfarsfelli verður tendrað í kestinum kl. 14:30 um daginn. Þetta kemur fram á vef Reykjavíkurborgar.

Áramótabrennur verða á eftirtöldum stöðum.

-Við Ægisíðu, stór brenna.

-Skerjafjörður gegnt Skildinganesi 48 - 52,  lítil brenna.

-Við Suðurhlíðar, neðan við Fossvogskirkjugarð, lítil brenna.

-Vestan Laugarásvegar móts við Valbjarnarvöll,  lítil brenna.

-Geirsnef, stór brenna.

-Við Suðurfell, lítil brenna.

-Fylkisbrennan við Rauðavatn, stór brenna.

-Gufunes við gömlu öskuhaugana, stór brenna.

-Kléberg á Kjalarnesi, lítil brenna.

-Úlfarsfell á athafnasvæði Fisfélagsins ofan við Lambhagaveg, lítil brenna (tendrað kl. 14:30).

Stærð brennanna ræðst af mati Eldvarnareftirlitsins á aðstæðum á hverjum stað og er það óbreytt frá fyrra ári.  Stóru brennurnar eru fjórar og þær minni sex talsins.

Fólk er hvatt til að skjóta ekki upp flugeldum við brennurnar. Stjörnuljós og blys eru betri kostur enda barnvænni og hættuminni. Flugeldar og tertur eru betur geymd heima.

Byrjað var að taka á móti efni á kestina mánudaginn 29. desember. Best er að fá hreint timbur á brennurnar og stærstur hluti þess sem fer á brennurnar eru vörubretti en einnig er fenginn afgangur af jólatrjáasölu. Plast, gúmmí og unnið timbur á ekki erindi í köstinn. Starfsmenn hverfastöðva Reykjavíkurborgar verða á vettvangi við flestar brennurnar og leiðbeina þeim sem koma með efni. Hætt verður að taka á móti efni þegar brennurnar eru orðnar hæfilega stórar eða í síðasta lagi kl. 12:00 á gamlársdag.