Margir framhaldsskólar nálægt gjaldþroti

Heimir Már Pétursson skrifar 5. febrúar 2014 20:00

Formaður Félags framhaldsskólakennara segir marga framhaldsskóla hættulega nálægt gjaldþroti. Hugmyndir menntamálaráðherra um frekari hagræðingu innan skólanna til að bæta hag kennara séu því slæmt innlegg í viðkvæmar kjaraviðræður.

Illugi Gunnarsson menntamálaráðherra sagði í fréttum okkar í gær að hann væri reiðubúinn að ræða um kerfisbreytingar á framhaldsskólunum, m.a. með því að stytta framhaldsnámið í þrjú á sem skapaði hagræðingu sem nýta mætti til að bæta kjör kennara.

„Okkar skoðun er að menntamálaráðherra sé algerlega á villigötum með þessar hugmyndir sínar. Ég vil benda á að frá hruni er búið að kreista út úr framhaldsskólakerfinu 12 milljarða. Kjörin hafa drabbast niður og rekstur skólanna. Margir framhaldsskólar eru komnir hættulega nálægt gjaldþroti,“ segir Aðalheiður Steingrímsdóttir formaður Félags framhaldsskólakennara.

Það þurfi miklu frekar að setja fjármuni inn í framhaldsskólakerfið, til að verja hagsmuni nemenda, kennara og almennings.

„Þannig að ég vil segja að þessar hugmyndir eru mjög slæmt innlegg inn í þessar erfiðu samningaviðræður sem eru núna í gangi,“ segiri Aðalheiður.

En vonbrigðin voru líka mikil með árangurslausan samningafund hjá Ríkissáttasemjara í morgun. Hún segir að til tíðinda hljóti að draga í næstu viku verði ekki breyting á afstöðu samninganefndar ríkisins á næsta fundi á mánudag.

„Það voru mikil vonbrigði hvað litið þokaðist í morgun því sáttasemjari hafði lagt til á fundi í síðustu viku að samninganefnd ríkisins kæmi með eitthvað inn á fundinn í dag til að þoka viðræðum eitthvað áfram og samninganefnd ríkisins kom algerlega tómhent á fundinn í dag,“ segir Aðalheiður.

Þá hafi ekki verið vilji hjá samninganefnd ríkisins til að ræða gögn kennara um þróun launa þeirra á undanförnum árum og daufar undirtektir við að setja meiri kraft í viðræðurnar.

„Eða að minnsta kosti að koma þeim í gang því þær eru ekki komnar í gang,“ segir Aðalheiður.

Eru þær þá í frosti?

„Já, það er alger pattstaða búin að vera frá 3. desember og við höfum ekki náð neinum árangri,“ segir hún.

Hvenær lýkur þessu þrátefli og hvenær segið þið, hér er komið nóg?

„Við höfum næstu viku til að gera það, í raun og veru,“ segir Aðalheiður Steingrímsdóttir.

Mest lesið

Fleiri fréttir