Fyrsti pólski geimfarinn heimsótti landa sína á Íslandi

Pólverjar búsettir á Íslandi fjölmenntu til að hitta fyrsta og eina geimfara Póllands sem var í heimsókn hér á landi. Geimfarinn segir það langþráðan draum að koma til Íslands - landsins sem hann sá utan úr geimnum.



Pólverjinn Mirosław Hermaszewski hefur dvalið hér á landi síðustu daga. Hann er þjóðþekktur í Póllandi enda fyrsti og eini Pólverjinn sem hefur farið út í geim. Það gerði hann árið 1978 þegar hann fór með rússneska geimfarinu Soyuz 30 og dvaldi í tæpa átta sólarhringa í rússneskri geimstöð. Fyrir geimferðina fékk Hermaszewski æðstu orðu sem veitt er hermanni í Sovétríkjunum.

Hermaszewski er 72 ára gamall og hélt hann fyrirlestur í Háskólanum í Reykjavík í gær þar sem hann fræddi samlanda sína og Íslendinga um geimferðina. Pólverjar á Íslandi fjölmenntu. Hermaszewski sagði að ekki væri langt þangað til að Pólverjar eignuðust fleiri geimfara.

„Eftir mína ferð út í geim þá var ég mjög bjartsýnn. Ég held að eftir þrjú ár þá muni næsti Pólverji fara út í geim. Það eru liðin 36 ár og enginn hefur enn farið. Ég er samt vongóður,“ segir Hermaszewski.

Draumur að rætast

Um 9.000 Pólverjar eru búsettir á Íslandi. Hermaszewski segir að það hafi lengi staðið til að heimsækja Ísland.

„Ég veit að það búa margir Pólverjar hér og að þeim líður vel hér á Íslandi. Ég vildi koma hingað og hitta Pólverja búsetta á Íslandi,“ segir Hermaszewski.

„Það hefur verið draumur minn að koma til Íslands, að sjá þetta fallega land. Ég sá Ísland úr geimnum og þess vegna ákvað ég að koma hingað.“