Hátt í hundrað fósturvísum hent árlega

Danskir læknar lögðu nýlega til að ættleiðing frystra fósturvísa yrði heimiluð, en árlega er þúsundum frjóvgaðra eggja hent þar í landi. Á Íslandi er þetta ólöglegt þótt leyfilegt sé að fá gefins bæði sæði og egg.

Snorri Einarsson er kvensjúkdómalæknir með ófrjósemi sem undirsérgrein og starfar hann á Art Medica. Snorri segir að hann og samstarfsfólk hans séu fylgjandi umræðu um ættleiðingar fósturvísa. „Þetta er náttúrulega eitthvað sem við, sem þjóð og samfélag, þurfum saman að taka afstöðu til,“ segir hann.

Á Art Medica eru geymdir um 2300 frosnir fósturvísar frá um 600 pörum. Á hverju ári er svo um 50 til 100 þeirra einfaldlega hent. Ættleiðingar fósturvísa eru leyfilegar til dæmis í Bandaríkjunum og í nokkrum Evrópulöndum en Snorri segir um flókið siðferðislegt mál að ræða, meðal annars þar sem beinlínis sé verið að skapa alsystkini þegar fæddra barna, til annarra foreldra. Þá sé umhugsunarefni hvort slíkar ættleiðingar ættu að vera opnar þannig að börnin gætu leitað uppi líffræðilega foreldra og öfugt auk þess sem álitamál geti komið upp í tengslum við erfðamál, veikindi og fleira.

Hefurðu fundið fyrir vilja hjá foreldrum sem hafa þurft að henda tilbúnum fósturvísum til að gefa sína?

„Sá vilji er tvímælalaust fyrir hendi og það sker auðvitað í hjarta þeirra sem hafa átt í vandræðum með þetta en hafa verið svo heppnir að ná að eignast börn, að eiga fósturvísa í frysti vitandi það að öðrum pörum gangi ekki eins vel og hafi ekki fengið að upplifa þessa hamingju. Það getur verið mjög erfitt fyrir þessi pör að láta eyða fósturvísunum.“