Bubbi og Kobbi á svið með Cornwell

Sannkölluð goðsögn í lifanda lífi, Hugh Cornwell sem fór fyrir Stranglers þá er frægðarsól þeirrar hljómsveitar var sem mest, er staddur á Íslandi. Hann var staddur í höfuðstöðvum 365 í morgun og ekki orðum aukið að það hafi farið skjálfti um margan manninn; ekki síst þá Bubba Morthens og Jakob Smára Magnússon; en Cornwell er í guða tölu hjá þeim. Tekinn var upp sérstakur viðtalsþáttur sem verður á dagskrá Bylgjunnar innan tíðar en það kom Cornwell á óvart hversu fróður Jakob Smári var um Stranglers; hann gat upplýst hann um þætti úr hljómsveitinni sem Cornwell vissi ekki sjálfur.

Sögufræg heimsókn til Íslands

Stranglers var í broddi fylkingar þegar pönkið umturnaði öllu og breytti rokksögunni á 8. áratug síðustu aldar. Stranglers komu til Íslands árið 1978 í tilefni útkomu plötunnar Black and White. Ákveðið var að halda 72 tíma fjölmiðlaveislu á hér á landi en á Ísland vart á tónlistarkortinu. En hingað mætti hljómsveitin ásamt troðfullri vél af blaðamönnum og ýmsu fólki tengdu breska tónlistarbransanum. Ferðalagið einkenndist af mikilli drykkju og sjaldan eða aldrei höfðu Íslendingar upplifað annað eins. Bandið var nánast óþekkt hér á landi, samt tókst að fylla Höllina og íslenskt tónlistarlíf tók stakkaskiptum. Nýtt tímabil hófst, pönkið var komið til landsins. Bubbi Morthens kann betur að segja frá því og Hugh Cornwell sem fór fyrir sveitinni:

„Halló! Þetta er maðurinn sem kastaði steininum í vatnið og svo erum við hin gárurnar. Það er bara þannig og ekki flóknara en það. Út úr þessu komu Utangarðsmenn, Þeysararnir, Purrkur Pillnikk, Björk og þannig má lengi telja. Jájá, þessi maður hefur haft meiri áhrif á tónlistarbransann á Íslandi en nokkurn grunar,“ staðhæfir Bubbi.

Kobbi vissi meira um Cornwell en hann vissi sjálfur

Stranglers voru í fararbroddi pönkbylgjunnar ásamt með hljómsveitum á borð við Ramones, Sex Pistols og Clash. Og þú bara eins og krakki í sælgætisverslun, Bubbi?

„Ég hafði rosalega gaman að þessu. Við tókum viðtal við hvorn annan, Kobbi bassaleikari, Cornwell og ég. Rifjuðum upp söguna. Þetta var dásamlegt.“

En, þið ætlið ekkert að stilla saman strengi ykkar og telja í?

„Hann bauð okkur Kobba að koma uppá svið og spila með, ef við vildum. Annað kvöld. Ef ég á heimangengt munum við sennilega taka Get a grip of your self. GET A GRIP OF YOUR SELF. Where the money‘s no good...“

Cornwell hætti í Stranglers árið 1990 og eru margir þeirrar skoðunar, þeirra á meðal Bubbi, að hljómsveitin hefði betur lagt upp laupana þá, svo mikið mark setti hann á sveitina, auk þess að vera einn helsti laga- og textahöfundur hljómsveitarinnar. En, Cornwell mun taka nokkur lög sem Stranglers gerðu þekkt annað kvöld á Gauki á Stöng.