„Námsmenn á Íslandi eru ekki forréttindahópur, heldur lágstétt“

Allar námsmannahreyfingar á Íslandi, á framhalds- og háskólastigi, standa nú fyrir mótmælum á Austurvelli.

„Við erum að hittast til þess að standa saman fyrir menntun komandi kynslóða og benda á að menntamál eru mál samfélagsins,“ segir María Rut Kristinsdóttir formaður Stúdentaráðs Háskóla Íslands en hún er ein þeirra sem stendur fyrir fundinum.

Samstöðufundurinn er haldinn til þess að vekja athygli á bágum kjörum stúdenta.

„Við erum að mótmæla þeim kjaraskerðingum sem eru yfirvofandi. Á morgun hittist stjórn LÍN þar sem örlög námsmanna verða ráðin. Það er búinn að vera niðurskurður í sex ár og það eru sex árum of mikið.“

Fulltrúi Stúdentahreyfingarinnar mun funda með LÍN á morgun en María segir nemendur ítrekað reynt að koma skilaboðum á framfæri til stjórnar LÍN.

Kröfur Stúdentahreyfingarinnar eru meðal annars þær að frítekjumörk sem nú eru verði hækkuð í að minnsta kosti 940 þúsund krónur, en þau hafa ekki hækkað síðan árið 2009.

„Þetta sýnir að námsmenn hafa tekið á sig gríðarlegar launaskerðingar síðustu ár.“

Einnig er krafa gerð um hækkun á grunnframfærslu, sem nú eru 144 þúsund krónur á mánuði og ekki í takt við neysluviðmið.

Þá er gerð krafa um að námsvindukröfur LÍN verði afturkallaðar, en til stendur að hækka einingarnar úr 18 í 22.

„Þetta fer þvert gegn því hvernig Háskóli Íslands starfar og hefur yfirstjórn HÍ sent þeim bréf þess efnis að þetta samræmist ekki kerfi skólans.“

María segir námsmenn á Íslandi ekki forréttindahóp, heldur lágstétt, sem hefur þurft að þola síendurteknar skerðingar og segir því mikilvægt að sem flestir mæti. Hún segir að fjárfesting í menntun og mannauði sé ein mikilvægasta fjárfesting samfélagsins.

Um þúsund manns hafa boðað komu sína.

Dagskráin hefst klukkan 15 og stendur til klukkan 16.10.