Ríkið skaðabótaskylt vegna slyss í leikfimitíma í MR

Héraðsdómur Reykjavíkur hefur dæmt íslenska ríkið skaðabótaskylt vegna slyss sem átti sér stað í leikfimitíma í Menntaskólanum í Reykjavík  þegar nemandi við skólann ökklabrotnaði í fótboltaleik í Hljómskálagarðinum í mars 2008.

Í niðurstöðu dómsins segir að slysið sé fyrst og fremst rakið til þess sem telja verður „mistök íþróttakennarans og gáleysi hans, að ákveða eftirlitslausan knattspyrnuleik nemenda þar sem hált var og holótt“. Kennaranum hafi átt að gera sér grein fyrir slysahættunni sem þessum aðstæðum fylgdi.

Slysið varð þegar nemandinn „rann til á hálku eða misfellu, féll í jörðina og slasaðist illa á hægri fæti.“ Var hann fluttur á slysadeild Landspítalans þar sem kom í ljós að hægri ökklinn væri illa afmyndaður og sýndu röntgenrannsókn brot á sperrilegg og að nemandinn hefði slitið liðbönd í hægri ökkla við fallið.

Héraðsdómur segir ríkið bera eftir almennum reglum um vinnuveitendaábyrgð skaðabótaábyrgð á því tjóni sem hlaust af þessum mistökum og gáleysi íþróttakennarans í Menntaskólanum í Reykjavík, að því er segir í dómnum.