Borgin heimilar götusölu í Austurstræti á ný

Borgarráð hefur samþykkt að veita tímabundið leyfi til götu- og torgsölu í Austurstræti líkt og verið hefur undanfarin ár. „Heimiluð er svokölluð markaðssala með einfalda söluaðstöðu,“ að því er segir í fréttatilkynningu frá Reykjavíkurborg. Samþykktin gildir til áramóta og verður tímann notaður til að endurskoða reglur um götu- og torgsölu í miðborginni.

Að sögn er söluaðilum gefið svigrúm með samþykktinni til að aðlagast reglum um götu- og torgsölu frá 3. apríl, en þá var markaðssala heimiluð á svæði við Bernhöftstorfuna, á Ingólfstorgi og á bílastæði við Geirsgötu. „Með því að leyfa sölu  í Austurstræti er verið að bregðast við athugasemdum söluaðila. Einnig verður gripið til ráðstafana til að bæta aðstæður á markaðssölusvæðum t.d. með tjöldum til að tryggja sýnileika þeirra.“

Á upplýsingasíðu um götu- og torgsölu segir að sala á markaðssvæðum sé heimiluð á tímanum 9 á morgnana til 21 á kvöldin og gerð er krafa um að útlit söluaðstöðu fari vel í umhverfinu og að efnisnotkun, ásýnd og yfirbragð sé vandað.

Söluleyfi fyrir markaðssölu kostar 20 þúsund krónur á mánuði.