Forseti Alþingis til Þýskalands

Einar K. Guðfinnsson, forseti Alþingis, hefur þegið boð um að vera aðalræðumaður og flytja setningarávarp fjölþjóðlegrar ráðstefnu sem haldin verður í Berlín dagana 7. til 10. nóvember í tilefni þess að 25 ár eru liðin frá falli Berlínarmúrsins.

Í tilkynningu frá Alþingi segir að ráðstefnan sé skipulögð af Institute for Cultural Diplomacy, félagasamtökum sem stofnuð voru árið 1999 með það að markmiði að stuðla að samræðum milli menningarheima og vinna að friði.

Á heimasíðu ráðstefnunnar kemur fram að auk Einars munu Halldór Ásgrímsson, fyrrum forsætisráðherra, og Árni Svanur Daníelsson prestur flytja ávörp.

Forseti Alþingis mun jafnframt eiga fund með Norbert Lammert, forseta þýska þingsins, á meðan heimsókn hans stendur.