Reyndu að smygla MDMA olíu í sjampóbrúsum

Tollverðir stöðvuðu nýverið póstsendingu, sem reyndist innihalda 350 millilítra af fíkniefninu MDMA-olíu. Sendingin kom frá Hollandi og var stíluð á einstakling hér. Olían hafði verið sett í umbúðir undan hársápu og með þeim hætti átti að koma henni inn í landið að því er segir í tilkynningu frá Tollinum.

Tollverðir haldlögðu efnið og fer lögreglan á höfuðborgarsvæðinu með rannsókn málsins.

Úr umræddu magni hefðu getað fengist 350 grömm af MDMA – dufti, eða allt að 3.500 E-töflur, en MDMA er virka efnið í E- töflum.

Tollstjóri minnir á fíkniefnasímann 800-5005. Í hann má hringja nafnlaust til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann.