Mikil reiði ríkjandi meðal flugfreyja

Sigríður Ása Harðardóttir, formaður Flugfreyjufélags Íslands, segir talsverða reiði ríkjandi meðal sinna félagsmanna. Þar hafa laun ekkert hækkað lengi og flugfreyjur tóku á sig talsvert meiri vinnu eftir hrun án þess að til kæmi kjarabót á móti. Fækkað var í hópi þeirra í áhöfn úr fimm í fjóra og verkefnum hefur verið bætt á þær til dæmis þegar frídagar eru. „Framleiðnin okkar jókst en launin okkar breyttust ekkert. Þeir hafa hægt og rólega verið að bæta á okkur vinnu um borð. Fjórar manneskjur komast bara yfir visst mikið,“ segir Sigríður Ása.

Flugfreyjufélag Íslands hefur boðað til yfirvinnubanns og vinnustöðvunar meðal félagsmanna sinna sem starfa hjá Icelandair. Vinnustöðvun hefur verið boðuð 27. maí milli kl. 06:00 og 24:00. Það er fyrsta vinnustöðvunin en svo taka sambærilega aðgerðir við koll af kolli, ef ekki semst: 6. júní frá kl. 06:00 til kl. 06:00 þann 7. júní, 12. júní frá kl. 06:00 til kl. 06:00 þann 14. júní og ótímabundin vinnustöðvun frá kl. 06:00 þann 19. júní.

Aðgerðirnar voru samþykkar með afgerandi meirihluta félagsmanna. Á kjörskrá voru 498. Atkvæði greiddu 287 eða 57,6 prósent. Já sögðu 276 eða 96,2 prósent. Nei sögðu 11 eða 3.8 prósent.

Samningsnefnd félagsins er nú á samningsfundi að sögn Sigríðar. Hún segir fullan samningsvilja fyrir hendi af hálfu félagsins, enda það að boða til aðgerða sem þessara ekki nokkuð sem neinn leiki sér að, en því sé ekki fyrir að fara meðal viðsemjenda þeirra. „Samningsviljinn er afskaplega lítill. Jújú, fólk er óánægt og reitt. Og óánægja í hópnum.“

Sigríður Ása gerir ráð fyrir því að komi til vinnustöðvunar þá verði ekki flogið. Flugfreyjur hafa ekki farið í verkfall síðan 1995. „Þá voru einhverjir yfirmenn sem fóru og mönnuðu tvær vélar, fóru á eitthvað skyndinámskeið,“ segir Sigríður. En þeir entust ekki lengi í því.

Flugmenn hafa sýnt sig í að vera einkar harðir í samningum. Þeir hafa nú samið en talað er um að sá samningur sé aðeins vopnahlé og gildir hann til 30. september. Sigríður Ása vill ekki tjá sig um samning flugmanna né heldur hvernig þeir hafa háð sína kjarabaráttu.

Uppfært kl. 16:00

Síðast hætti flugfreyja árið 2009

Þorsteinn Víglundsson framkvæmdastjóri Samtaka atvinnulífsins segir ekki rétt að flugfreyjur hafi lítið sem ekkert hækkað í launum. Hann vísar til sameiginlegrar skýrslu sem SA, ASÍ og opinberu stéttarfélögin öll stóðu að þar sem tekin er saman launaþróun á almennum vinnumarkaði, og opinberum reyndar einnig. Skýrslan tekur til tímabilsins 2006 til 2013 með að telja.

„Þar kemur fram að almennt hefur launaþróun flestra hópa verið mjög áþekk; hækkun í kringum 50 prósent. Í samantekt SA um launaþróun hjá flugstéttum á sama tímabili kemur í ljós að þær skera sig nokkuð úr; flugfreyjur hafa hækkuðu um rúmlega 70 prósent á þessu tímabili,“ segir Þorsteinn.

Framkvæmdastjóri SA bendir jafnframt á að árlega sæki 14 hundruð manns um hundrað lausar stöður hjá Icelandair. „Starfsmannavelta er nær engin þannig að fólk er þarna greinilega ánægt í starfi. Starfsaldur er hár og fólk hættir ekki þegar það er komið með fastráðningu, þá ef undan er skilið að fólk fari á eftirlaun eða slíkt. Síðast þegar einhver hætti, fastráðinn flugliði, sem var með fastráðningu, var árið 2009. Sem bendir til þess að fólk sé afar sátt við kjör sín.“