Öryggisæfing í stjórnarráðinu

Rýmingaræfing fór fram í stjórnarráðinu nú fyrir skömmu.

Um var að ræða æfingu þar til að tryggja öryggi æðstu stjórnar ríkisins en í slíkum æfingum taka lögreglan, slökkviliðið, fjarskiptamiðstöð forsætisráðuneytisins og sérsveitin þátt samkvæmt upplýsingum frá lögreglunni.

„Það björguðust allir,“ segir Sigurður Már Jónsson upplýsingafulltrúi ríkisstjórnarinnar léttur í bragði.

Hann segir aðeins um tilfallandi rýmingaræfingu að ræða sem ákveðið hafi verið að ráðast í til að skerpa á ferlum.

„Ég vissi ekki af þessu og fæstir starfsmenn utan þeirra sem hafa einhver ákveðin verkefni, rýmingarfulltrúar, þeir vissu þetta.“

Hann segir æfinguna hafa gengið vel. „Það voru svona smáhnökrar hér og þar, þetta er náttúrulega verndað hús í bak og fyrir sem gerir það kannski erfiðara fyrir að setja upp þann búnað sem þarf þannig að menn þurfa að hafa ákveðna útsjónarsemi í kringum það. En þetta gekk allt vel.“