Kindum slátrað vegna brota á dýraverndarlögum

Matvælastofnun fjarlægði í gær rúmlega þrjú hundruð kindur af bænum Efri-Steinsmýri nálægt Kirkjubæjarklaustri. Starfsmenn MAST og lögreglumenn fóru að bænum í gærmorgun og tóku allar kindur af bænum vegna brota á dýraverndarlögum.

Kindurnar voru fluttar á brott á bílum frá SS á Selfossi, en þær voru fluttar þangað til slátrunar á kostnað ábúenda.

Sigurborg Daðadóttir, yfirdýralæknir, segir þetta hafa verið fyrirbyggjandi aðgerð vegna þess að margítrekað sé búið að fara fram á úrbætur, vegna vanhirðu og slæms aðbúnaðar kindanna sem ekki hafi verið orðið við á fullnægjandi hátt.

Viðkomandi bóndi fékk viðvörun í vor um að svona gæti farið og fékk sex mánuði til að bæta úr málum. Samkvæmt heimildum Vísis stendur yfir bygging á nýju fjárhúsi við bæinn, en það er óklárað.

Aðgerð Matvælastofnunar byggir á nýjum lögum um velferð dýra sem gerir stofnuninni heimilt að fara í fyrirbyggjandi aðgerðir til að koma í veg fyrir illa meðferð dýra.

Sigurborg segir þetta vera umfangsmestu aðgerð sem stofnunin hafi framkvæmt frá því að nýju lögin tóku gildi.

Guðmundur Ingi Ingason, varðstjóri lögreglunnar á Kirkjubæjarklaustri segir aðgerðirnar hafa gengið slysalaust fyrir sig.

Ekki náðist í ábúendur á Efri-Steinsmýri við vinnslu fréttarinnar.