Óvenju öflug lægð yfir landinu um miðja viku

Útlit er fyrir vonskuveður um miðja vikuna, þar sem óvenju öflug lægð miðað við árstíma fer yfir landið með tilheyrandi rigningu og hvassviðri. Þetta kemur fram í tilkynningu frá Veðurstofu Íslands.

Mikil rigning og hvassviðri verður á landinu á þriðjudag, einkum suðvestanlands. Á miðvikudag verður mest úrkoma norðvestanlands og á Vestfjörðum en hvassast úr norðvestri á suðvestanverðu landinu. Fólk sem hyggur á ferðalög er hvatt til að fylgjast vel með veðurspám næstu daga.

Að þessu tilefni hefur Veðurstofa Íslands sent frá sér eftirfarandi tilkynningu:

Viðvörun vegna óvenju djúprar lægðar 1. - 5. júli

Gert er ráð fyrir óvenju öflugri lægð miðað við árstíma á þriðjudag, sem fer yfir landið á miðvikudag.

Á þriðjudag verður lægðin vestur af landinu og vindáttin því suðaustlæg og má búast við að vindstyrkurinn verði á bilinu 10-18 m/s, einna hvassast um landið SV-vert og hviður við fjöll allt að 35 m/s. Þessu fylgir mikil rigning, mest sunnanlands síðdegis og um kvöldið.

Á miðvikudag er að sjá að lægðin fari til norðausturs og verði skammt norður af landinu. Á þessari stundu er óvíst hvar versta veðrið verði, en vísbendingar eru um að mesti vindurinn verði úr norðvestri um landið suðvestanvert um kvöldið á meðan mesta úrkoman verður líklega norðvestanlands og á Vestfjörðum.

Síðan er gert ráð fyrir að lægðin fari til austurs og ákveðin norðanátt taki yfir með rigningu fyrir norðan, en þurrt að kalla syðra.

Lítið þarf út af að bera í staðsetningu lægðarinnar til að áhvarða hvar versta verðið verður á hverjum tíma, þannig að einhverra breytinga er að vænta þegar nær dregur. 

Að gefnu tilefni viljum við minna þá ferðalanga á sem eru með aftanívagna að huga sérstaklega að veðurathugunum og veðurspá næstu daga og að þeir sem eru að fara að heiman að huga að lausamunum.