Segir aðferðafræðina við flutning Fiskistofu kolranga

Aðferðafræðin við flutning höfuðstöðva Fiskistofu er kolröng og úrelt, segir Árni Stefán Jónsson, formaður SFR. Árni Stefán nefnir sérstaklega að sú leið að flytja tugi manna landshluta á milli ásamt fjölskyldum sínum sé aðferð sem sé ekki lengur viðhöfð.

„Ef markmiðið með þessu er að fjölga störfum á landsbyggðinni þá finnst mér þessi aðferðafræði algjörlega út í hött. Ég hélt að þessi aðferðafræði hefði orðið undir. Ef menn vilja fjölga opinberum störfum úti á landsbyggðinni, sem ég í sjálfu sér hef alls ekki á móti, þá eiga menn að byrja þegar koma upp ný verkefni,“ segir Árni í samtali við fréttastofu Bylgjunnar.

Við þetta mun þurfa að byggjastofnunina upp frá grunni á nýjum stað, segir Stefán, og að það muni bitna illa á faglegu gildi hennar.

„Við munum bara setja okkur í samband við ráðuneytið og við munum tala við okkar félagsmenn og við munum fara yfir málið, hvernig lagalega hliðin stendur í þessu. Þarf ekki að breyta lögum? Þarf þetta ekki að fara fyrir Alþingi? Hver er réttarstaða starfsmanna? Og svo framvegis.“ 

Þingmenn Sjálfstæðisflokksins á höfuðborgarsvæðinu lýsa efasemdum og andstöðu við aðgerðina.

Jón Gunnarsson, þingmaður suðvesturkjördæmis og formaður atvinnuveganefndar Alþingis lýsti í samtali við fréttastofu Bylgjunnar í morgun einnig áhyggjum sínum af þessari aðgerð, vegna atvinnumála í Hafnarfirði og bendir á að nýlega tapaði bærinn 60% af aflaheimildum sínum en einnig þurfi að taka tillit til fjölskylduaðstæðna starfsfólksins og það þurfi að taka alvarlega.

Þá skrifar Brynjar Níelsson á Facebook-síðu sína að aðgerðin sé ekki boðleg.