Foreldrum barna ekki tilkynnt um hugsanlegan myglusvepp í Árseli

Grunur leikur á að myglusveppur hafi fundist í frístundamiðstöðinni Árseli í Árbæ. Óhreinindi fundust undir parketi í danssal í mars síðastliðnum, en niðurstöður um hvort myglusvepp sé að ræða liggja ekki fyrir. Búið er að hreinsa burt óhreinindin og skipt hefur verið um parket.

Einn starfsmaður hefur fundið fyrir einkennum en beðið er eftir niðurstöðu lækna um hvort einkennin séu af völdum sveppsins. Foreldrum barna hefur ekki verið tilkynnt um hugsanlegan myglusvepp. 

„Heilbrigðiseftirlitið tók þá ákvörðun að ekki væri þörf á að tilkynna foreldrum barna þetta því börnin eru þarna einungis þrjá tíma á dag, starfsmennirnir í átta tíma á dag og enn er ekkert staðfest,“ segir Jóhannes Guðlaugsson, forstöðumaður Ársels og bætir við að starfsmönnum Ársels hefur þegar verið boðin læknisskoðun.

„Við höfðum fundið einhverja lykt, en talið er að hún hafi komið úr skolpi. Það er enn í athugun en skipt verður um vatnslása í ræsum.“

Einkenni vegna myglusvepps líkjast oft flensueinkennum. Einkennin tengjast oft efri hluta öndunarvegar, höfuðverkur, erting í augum, stíflað nef og hósti og oft fylgir magaverkur og óþægindi í maga. Sumar tegundir myglusveppa geta valdið ofnæmi og astma eða gert astma verri hjá þeim sem þjást af honum. Áhrifin verða oft meiri hjá ungum börnum, gömlu fólki og þeim sem glíma við sjúkdóma.

Frístundaheimilið Ársel er opið alla virka daga frá kl 13.40 til klukkan 17 fyrir börn í Árbæjarskóla á aldrinum sex til níu ára.