Jón tók á móti Hafmeyjunni

Jón Gnarr, borgarstjóri, tók formlega á móti Hafmeyjunni í Hljómskálagarðinum í dag.

Verslunarmiðstöðin Smáralind gefur Reykjavíkurborg höggmyndina Hafmeyjuna eftir Nínu Sæmundsson í höggmyndagarð sem komið verður upp til minningar um formæður íslenskrar höggmyndalistar í Hljómskálagarðinum.

Önnur afsteypa Nínu af Hafmeyjunni stóð í Tjörninni fyrir um 55 árum eða frá ágúst 1959 til nýársdags 1960 þegar hún var sprengd í loft upp.

Hafmeyjan er steypt í brons eftir frummynd, sem Nína vann um 1948.

Hugmyndin að listaverkinu er komin frá þjóðsögunni um hafmeyjuna sem sat á kletti í hafinu og lokkaði sjófarendur með söng sínum, þeir hurfu síðan niður í sjávardjúpin í faðmi hennar.