Óvissa í sjúkraflugi fyrir Sauðkrækinga

Þorkell Ásgeir Jóhannsson, flugstjóri hjá Mýflugi, segir að vegna skorts á viðhaldi og hreinsun á flugvellinum við Sauðárkrók hafi alvarlega slasaður maður fyrst verið fluttur með bíl til Akureyrar í stað þess að vera sendur beint til Reykjavíkur með sjúkraflugi.

Þetta kemur fram í tölvupósti Þorkels til sveitarstjórnarinnar í Skagafirði þar sem hann ræðir um bílslys sem varð 23. október nærri Varmahlíð. Eins og kunnugt er annast Mýflug sjúkraflug fyrir ríkið.

„Slösuðust þrír í árekstrinum og þurfti að flytja einn með sjúkraflugi til Reykjavíkur til aðhlynningar. Alexandersflugvöllur við Sauðárkrók var ekki kostur í stöðunni, þar sem ryðja hefði þurft flugbrautina og hálkuverja og aukin heldur var bifreið sú sem notuð er til þessa verks rafmagnslaus þegar til átti að taka,“ segir um málavexti í fundargerð byggðaráðs Skagafjarðar þar sem tölvupóstur Þorkels var lagður fram.

„Allt leiddi þetta til þess að fagaðilar á slysstað afréðu að senda þennan sjúkling með bíl til sjúkrahússins á Akureyri til fyrstu aðhlynningar, þrátt fyrir snjóalög og ísingu á þjóðveginum um Öxnadalsheiði,“ er vitnað beint til bréfs Þorkels. „Ljóst er að fyrirbyggjandi eftirlit með ástandi flugbrautarinnar og hreinsun eftir þörfum ásamt með viðhaldi tækjabúnaðar, hefði í þessu tilfelli flýtt verulega fyrir nauðsynlegri læknisaðstoð fyrir hinn alvarlega slasaða sjúkling.“

Þorkell segir að á meðan ekki sé um fyrirbyggjandi viðhald og hreinsun flugbrautar héraðsins að ræða kunni fleiri bráðatilfelli vegna slysa eða veikinda að verða fyrir „alvarlegum viðbragðstöfum“ og það „hugsanlega með hörmulegum afleiðingum“.

Byggðaráð fól sveitarstjóranum að afla frekari upplýsinga um málið. „Ljóst er að núverandi ástand er með öllu ólíðandi fyrir íbúa Skagafjarðar og nærliggjandi byggða,“ bókaði byggðaráðið.