Styrkur svifryks yfir heilsuverndarmörkum

Heilbrigðiseftirlit Reykjavíkur fylgist náið með loftgæðum borgarinnar og sendir frá sér viðvaranir og leiðbeiningar ef ástæða þykir til.

Styrkur svifryks fór í gær yfir sólarhringsmörk skv. mælingum við Grensásveg. Líklegt er að styrkur svifryks verði einnig yfir heilsuverndarmörkum í Reykjavík í dag og á morgun.

Í dag er hægur vindur, götur þurrar og samkvæmt upplýsingum frá Veðurstofu Íslands litlar líkur á úrkomu fyrr en á fimmtudag. Klukkan 12:30 var hálftímagildi svifryks við mælistöðina á Grensásvegi 94 míkrógrömm á rúmmetra en sólarhrings heilsuverndarmörkin eru 50 míkrógrömm á rúmmetra.

Bent skal á að svifryksmengun er mest í nágrenni við miklar umferðargötur en minni mengun er inn í íbúðarhverfum fjær umferð. Í hægum vindi þyrlast ryk upp af götum og má búast við toppum í svifryksmengun á umferðarálagstímum á morgnanna, í hádeginu og í eftirmiðdaginn.

Hægt er að fylgjast með styrk svifryks á vefsvæði Reykjavíkurborgar en þar má sjá kort yfir mælistaði í Reykjavík m.a. mælistöð á Grensásvegi.

Loftgæðafarstöðvar Heilbrigðiseftirlits Reykjavíkur er að þessu sinni staðsettar annars vegar í Vonarstræti og hins vegar í Grafarvogi við leikskólann Sjónarhól, Völundarhúsum.