Borgin tekur stakkaskiptum á næstu árum

Miklar breytingar verða á áberandi svæðum í miðborginni og víðar nái áform meirihlutans í borgarstjórn um byggingu fimm þúsund nýrra íbúða á næstu fimm árum fram að ganga. Borgarstjóri kynnti áformin fyrir fréttamönnum í dag.

Uppbyggingin miðar að því að þétta byggð í borginni og nær til fjölda svæða í Vesturbæ og miðborginni, við gömlu höfnina, iðnaðarhverfinu inni í Vogum sem og til nýrri hverfa borgarinnar.

Á gamla hafnarsvæðinu verður til að mynda reist ný byggð með 128 íbúðum við svo kallaða Vesturbuggt og í Tryggvagötu á lóð við Borgarbókasafnið verður byggt fjölbýlishús. Ásýnd Ingólfstorgs mun einnig taka nokkrum breytingum.

Þá mun fjöldi íbúða rísa við Hverfisgötu og á reitum milli hennar og Laugavegar þannig að fjölmörg rótgróin götuhorn taka stakkaskiptum og byggt verður á baklóðum sem og á bílastæði bakvið byggingu sem áður hýsti Landsbankann á Laugavegi 77.

Lýsisreiturinn verður allur annar eftir að fjöldi íbúða verður byggður þar og áður hefur verið greint frá uppbygingu við Hlíðarenda en nýir háskólagarðar munu líka breyta ásýnd Öskjuhlíðar.

Mörg svæði í Holtunum svo sem eins og á Hampiðjureitnum munu breytast mikið og sömu sögu má segja um stórt svæði í Vogunum þar sem nú er varla annað en iðnaðarhúsnæði.

Þá verður byggt meira í Bryggjuhverfinu og byggð verður þétt til muna í nýrri hverfum í austurborginni, svo eitthvað sé nefnt. Samtals fimm þúsund íbúðir á fimm árum.

Hér má skoða nýtt skipulag á myndrænan hátt.