Lífið heldur áfram eftir ráðherradóm

Tuttugu ár eru í dag frá því Guðmundur Árni Stefánsson gekk út af síðasta ríkisráðsfundi sínum á Bessastöðum eftir að hafa sagt af sér embætti félagsmálaráðherra daginn áður. Hann sagði þá að lífið héldi áfram eftir ráðherradóm og sat á þingi í ellefu ár til viðbótar áður en hann varð sendiherra í Washington.

Guðmundur Árni Stefánsson var bæjarstjóri fyrir Alþýðuflokkinn í Hafnarfirði á árunum1986-1993 þegar hann var kosinn á Alþingi.  Hann var heilbrigðis- og tryggingarmálaráðherra frá júní 1993 og síðan  félagsmálaráðherra  júní 1994 þar til hann sagði af sér embætti hinn 11. nóv. 1994. Þá eins og nú varðandi innanríkisráðherra og ráðuneyti hennar snérist umræðan meðal annars um minnisblað. En Ríkisendurskoðun hafði gefið út skýrslu um embættisfærslur Guðmundar Árna nokkrum dögum áður.

Þegar Guðmundur Árni greindi frá afsögn sinni sagði hann skýrslu Ríkisendurskoðunar reyndar staðfesta í einu og öllu að stjórnsýsla hans hefði verið í samræmi við reglur og venjur. En mjög var herjað á Guðmund og Alþýðuflokkinn og það var stutt í kosningar.

Ljóst er að við slíkar aðstæður hafa og munu mín mikilvægu störf sem mér hefur verið trúað fyrir í félagsmálaráðuneytinu ekki njóta sannmælis og hugsanlega skaðast. Jafnframt er ljóst að Alþýðuflokkurinn hefur á sama hátt ekki hlotið sanngjarna umfjöllun. Það sama gildir að hluta um ríkisstjórnina,“ sagði Guðmundur Árni á blaðamannafundi í gömlu Rúgbrauðsgerðinni hinn 11. Nóvember 1994.

Daginn eftir afsögnina urðu ráðherraskipti á Bessastöðum þar sem Guðmundur Árni sat sinn síðasta ríkisráðsfund og Rannveig Guðmundsdóttir tók við af honum, þá áttundi ráðherrann frá Alþýðuflokknum í ríkisstjórn Davíðs Oddssonar.

Þegar Guðmundur Árni var spurður á hlaðinu á Bessastöðum að loknum ríkisráðsfundi hvað tæki nú við hjá honum, svaraði hann:

„Lífið er nú ekki hætt og það byrjar ekki og endar á ráðherrastóli. Ég helli mér í þingstörfin og þau störf sem sannarlega fylgja því að vera varaformaður Alþýðuflokksins. Við erum að fara í kosningavetur. Það eru örfáir mánuðir til kosninga. Nú mun ég hella mér í undirbúning kosningabaráttunnar,“ sagði Guðmundur Árni á Bessastöðum. En hann sat á Alþingi í ellefu ár til viðbótar og lætur að störfum sem sendiherra Íslands í Washington um áramótin.