Fær 5 milljónir í skaðabætur vegna varanlegra áverka eftir bílslys

Hæstiréttur staðfesti í dag úrskurð Héraðsdóms Reykjavíkur um greiðslu skaðabóta til konu vegna líkamstjóns sem hún varð fyrir er önnur kona ók aftan á hana. Bílslysið varð á gatnamótum Kringlumýrarbrautar og Háaleitisbrautar í maí 2006. Konan stefndi Vátryggingarfélagi Íslands og konunni sem ók aftan á hana í nóvember 2012.  

Tveimur dögum eftir slysið leitaði konan sem keyrt var aftan á til læknis vegna verkja í baki og hnakka. Var hún þá greind með tognun og ofreynslu á hálshrygg og einnig á brjósthrygg. Var mælt með því við heimilislækni konunnar að hún færi í sjúkraþjálfun en af því varð ekki. Konan var undir eftirliti heimilislæknis síns eftir þörfum. Hún fór til hans í mars 2007 en var að öðru leyti í símasambandi við hann.

Í febrúar 2010 fór konan til heimilislæknisins vegna bakverkjarins sem komið hafði í kjölfar slyssins. Verkurinn var farinn að trufla svefn konunnar og þurfti hún að komast í sjúkraþjálfun. Konan fór sjö sinnum í sjúkraþjálfun og var árangurinn af meðferðinni viðunandi.

Í kjölfarið leitaði konan til lögfræðings sem sendi hana til skoðunar hjá bæklunarlæknum og taugalækni. Mat sérfræðinga var lagt fyrir dóminn og kom þar fram að konan hefði hlotið 7% varanlega örorku. Töldu þeir áverkana að auki þess eðlis að konan ekki getað gert sér grein fyrir því fyrr en árið 2010 að líkamstjónið sem hún varð fyrir væri varanlegt.

Stefndu kröfðust sýknu og töldu ósannað að orsakatengsl væru á milli þess líkamstjóns sem skaðabótakrafan byggði á auk þess sem deilt var um hvort að málið væri fyrnt eða ekki.

Dómurinn féllst ekki á að málið væri fyrnt og taldi gögn málsins sanna orsakatengsl á milli áverkanna og bílslyssins. Voru Vátryggingarfélag Íslands og konan sem olli aftanákeyrslunni því dæmd til að greiða konunni tæpar 5 milljónir króna í skaðabætur með dráttarvöxtum.

Dóminn má nálgast í heild sinni hér.