Tugir milljóna sparast á ári hverju

Um 4.500 máltíðir eru framleiddar daglega í eldhúsi Landspítalans. Fyrir nokkrum árum ákváðu stjórnendur þar á bæ að hefja átak gegn matarsóun þegar þeim blöskraði hversu miklu magni matar var hent á degi hverjum.

„Við byrjuðum að meta og mæla, hvað það var sem var skilið eftir og breyta í kjölfarið matseðlum. Við ákváðum að auka val fyrir starfsmenn og sjúklinga svo þeir væru þá ekki að fá eitthvað sem þá langaði ekki í,” Heiða Björk Hilmisdóttir, deildarstjóri eldhúss og matsala á Landspítalanum.

„Við forum einnig að fylgjast betur með innkaupum og stýra því betur hvað við eldum mikið magn af mat á degi hverjum.”

Aðgerðir starfsmanna Landspítalans hafa þegar skilað miklum  árangri.  Matarsóun hefur dregist saman um 40% í framleiðslueldhúsi sem og í afgöngum hjá sjúklingum.

Og nemur sparnaðurinn um 20 til 30 milljónum ár hvert. Aðgerðirnar hafa forðað um 20 tonnum á ári af mat frá þvi að enda í ruslinu á hverju ári, eða um 50 kílóum á hverjum degi.

„Það munar um minna. Þessar 20 til 30 milljónir getum við svo nýtt í annað,” segir Heiða.

Hinar nýju aðgerðir mælast vel fyrir í rannsóknum á ánægju sjúklinga og starfsmanna.

„Við bættum við meira úrvali í matsölunum okkar og ásókn starfsfólks jókst samhliða um 30% auk þess sem ánægjan jókst um 50%. Auk þess sem sóunin minnkaði mjög mikið.

Og þó sýnilegur árangur sé mælanlegur er aðgerðunum hvergi lokið. Áfram á að vinna að betri nýtingu matvæla inna Landspítalans, samhliða því að val matargesta verður aukið.