Sleipiefnaþjófurinn lætur ekki finna sig

Lögreglan á Akureyri veit hver hinn svokallaði sleipiefnaþjófur er, en lögreglumönnum hefur ekki enn tekist að finna hann. Þetta segir lögreglumaður rannsóknardeildarinnar á Akureyri. Í byrjun október sagði Vísir frá því að maður hefði komið við í Akureyrarapóteki og stolið sleipiefni og smokkum í tvígang.

Gauti Einarsson lyfjafræðingur hafði samband við lögreglu vegna málsins og afhenti henni upptökur úr öryggismyndavélum í apótekinu. Gauti skrifaði um málið á Facebook-síðu sína þar sem hann sagði:

„Á ég að segja ykkur? Haldið ekki að sleipiefnabófinn hafi látið á sér kræla að nýju akkúrat 2 vikum eftir síðasta áhlaup. En hann rann mér sem fyrr úr greipum. Það gerir ein vika per brúsa sem verður að teljast nokkuð gott hjá honum. Samstarfskonur mínar eru allar komnar með Stokkhólmsheilkennið og finnst ég bara ómenni að vilja góma hann. En ég skal ná í „skottið” á honum þótt síðar verði,“ og bætti við:

„Það hefði óneitanlega getað boðið upp á makleg málagjöld ef hann hefði svo ruglast og hnuplað tannlíminu.“

Á brotaferil að baki

Að sögn lögreglunnar á Akureyri er vitað hver maðurinn er, en hann hefur ekki enn verið handsamaður. „Þetta er sleipur náungi,“ segir lögreglumaður rannsóknardeildar. Sleipiefnaþjófurinn lætur ekki finna sig og telja lögreglumenn að honum sé ekki vel við lögregluna.

Samkvæmt heimildum Vísis hefur þjófurinn ekki birst aftur í Akureyrarapóteki eftir að fréttin birtst þann 9. október.

Sleipiefnaþjófurinn lét greipar sópa í apótekinu í tvígang. Í seinna skiptið sást hann ekki stela sleipiefni á myndbandsupptökunni, en samt hvarf sleipiefni á sama tíma og þjófurinn var inni í apótekinu. Gauti sagði við Vísi í október: „Ef sleipiefni hvarf fyrir tilstuðlan þjófsins, þá er greinilegt að hann er eitthvað að prófa sig áfram, að prófa nýjar tegundir.“