Kalla inn Bibi snuð

Neytendastofa vekur athygli á því að að ný tegund Bibi snuða frá Nuggi hafa verið innkölluð vegna köfnunarhættu. Snuðið heitir All new generation soothers, og er frekar gegnsætt í útliti og ekki með snuðhaldi.

Í tilkynningu á vef Neytendastofu segir að Ýmus ehf., umboðsaðili Bibi á Íslandi, hafi innkallað snuðin en fjögur eintök gætu hugsanlega hafa verið seld áður. Þá sé ekki vitað hvort varan hafi borist hingað til lands með öðrum leiðum.

Innköllunin er vegna köfnunarhættu, þar sem túttan á snuðinu getur losnað við sogkraft eða bit barnsins. Neytendastofa hvetur þá neytendur sem eiga þessa vöru að hætta notkun hennar strax.