Eldvarnir mun lakari hjá leigjendum

Í könnun Capacent Gallup kemur í ljós að eldvarnir eru mun lakari hjá leigjendum en þeim sem búa í eigin húsnæði.

Björn Karlsson, forstjóri Mannvirkjastofnunar, segir að bregðast þurfi við þessu með því að setja ákvæði í húsaleigulög og löggilta leigusamninga um skyldur leigusala vegna eldvarna.

Rannsóknin var unnin fyrir Landssamband slökkviliðs- og sjúkraflutningamanna og Eldvarnabandalagið en framkvæmdartíminn var frá 25. september til 6. október á þessu ári.

Úrtakið var 1449 manns á öllu landinu, 18 ára og eldri, handahófsvaldir úr Viðhorfahópi Capacent Gallup. 595 manns svöruðu ekki og 854 svöruðu könnuninni. Þátttökuhlutfallið var því 58,9%.