Meirihlutinn vill Ólaf Ragnar áfram

Mikill meirihluti hlustenda Útvarps Sögu vill að Ólafur Ragnar Grímsson forseti Íslands bjóði sig aftur fram í komandi forsetakosningum. Um er að ræða niðurstöðu vefkönnunar sem fram fór fram á vefsíðu útvarpsstöðvarinnar síðasta sólarhringinn þar kemur fram að um sjötíu prósent vilja að Ólafur Ragnar bjóði sig fram aftur. Spurt var: Vilt þú að Ólafur Ragnar Grímsson bjóði sig aftur fram í embætti forseta Íslands? Já svöruðu  rúm 68 prósent eða 335 atkvæði. Nei sögðu hins vegar 29 prósent meðan hlutlausir voru 3 prósent.

Þessi niðurstaða stangast á við nýlega könnun sem Fréttablaðið birti og greindi frá um helgina en þar kemur fram að mikill meirihluti aðspurðra vill sjá Jón Gnarr, fyrrverandi borgarstjóra, á Bessastöðum, eða 47 prósent. Hringt var í 1.241 manns þangað til 801 svaraði. Alls tóku 34 prósent aðspurðra í könnuninni afstöðu til spurningarinnar með því að nefna tiltekið nafn. Sú könnun hlýtur að teljast marktækari en vefkönnun Útvarps Sögu, en vefkannanir þykja ekki mjög áreiðanlegar en engu að síður er í þessu vísbendingar um að til einvígis þessara tveggja gæti komið eftir tvö ár. Því könnun Fréttablaðsins er ekki jafn afgerandi og þessi.

Ólafur Ragnar er fimmti forseti lýðveldisins Íslands. Hann var endurkjörinn forseti vorið 2012 og að óbreyttu mun kjörtímabil hans renna út 31. júlí 2016. Hann hefur þá verið forseti Íslands í 20 ár, lengur en nokkur annar, en 9 prósent í könnun Fréttablaðsins vilja sjá hann áfram sem slíkan, jafn margir og geta vel hugsað sér að Ragna Árnadóttir, fyrrverandi dómsmálaráðherra, verði næsti forseti lýðveldisins. Hvorki Jón né Ólafur hafa viljað svara með afgerandi hætti hvort þeir ætli fram eða ekki.