Fundi slitið eftir árangurslausar viðræður

Fundi samninganefndar Sambands íslenskra sveitarfélaga, sem fer með samningsumboð Kópavogsbæjar, og samninganefndar Starfsmannafélags Kópavogs hjá Ríkissáttarsemjara var slitið eftir árangurslausar viðræður í dag. Þetta kemur fram í tilkynningu frá Kópavogsbæ.

„Ástæða viðræðuslita er ófrávíkjanleg krafa Starfsmannafélags Kópavogs (SfK) um að sérákvæði um háskólamenntaða félagsmenn Starfsmannafélagsins verði áfram hluti af kjarasamning Starfsmannafélags Kópavogs við Kópavogsbæ. Á það fellst Kópavogsbær ekki.“

Sérákvæðið er nefnd háskólabókun og í henni felst að háskólamenntaðir starfsmenn innan SfK fái laun samkvæmt kjarasamningum háskólamanna.

„Þetta sérákvæði er þannig brot á þeirri meginreglu á vinnumarkaði að félagsmenn stéttarfélaga greiði fyrir hagsmunagæslu til stéttarfélags síns og felur þannig í sér ójafnræði gagnvart stéttarfélögum. Ekki er að finna sambærilegt ákvæði í neinum öðrum kjarasamningi á landinu. Ákvæðið varðar tæplega 20 af um 800 félagsmönnum SfK,“ segir í tilkynningunni.

Kópavogsbær hvetur SfK til þess að undirrita sama kjarasamning og Samband íslenskra sveitarfélaga hefur samið um við önnur bæjarstarfsmannafélög. Með honum sé félagsmönnum tryggð allt að níu prósenta launahækkun.

Að öllu óbreyttu mun verkfall starfsmanna Kópavogsbæjar sem eru í SfK á mánudagsmorgun klukkan sex. Upplýsingar um áhrif verkfallsins á þjónustu bæjarins verða settar inn á vef Kópavogsbæjar fyrir helgi. Þá munu forsvarsmenn stofnana eins og skólastjórar, leikskólastjórar og aðrir, senda út tölvupósta um áhrif verkfallsins.