Tugir ferðamanna deyja á Íslandi ár hvert

Með fjölgun ferðamanna fjölgar einnig þeim útlendingum sem deyja á Íslandi en stærsta útfararstofa landsins reiknar með að sjá um fjörtíu til fimmtíu látna útlendinga í ár. Mun færri Íslendingar deyja í útlöndum en útlendingar hér á landi.

Morgunblaðið greinir frá því í dag að það færist í vöxt að erlendir ferðamenn deyji á Íslandi enda hefur þeim fjölgað mikið á undanförnum árum. Elín Sigrún Jónsdóttir framkvæmdastjóri Útfararstofu kirkjugarðanna staðfestir þetta.

„Ég reikna með því að á þessu ári verði þetta á bilinu 40 til 50 manns,“ segir Elín Sigrún. Þetta sé vissulega há tala.

„Jú, hún er það og hefur farið mjög vaxandi. Þetta er auðvitað bara sú tala sem við hjá Útfararstofa kirkjugarðanna erum að annast. En ég á von á því að við séum með stærstan hluta þessa útflutnings en ég veit ekki hver heildartalan er,“ segir Elín Sigrún og nokkrar aðrar útfarartofur eru starfandi í landinu.

Flestir þeirra sem látast á Íslandi séu Bandaríkjamenn, Þjóðverjar og Pólverjar, og oftast er um ferðamenn að ræða sem deyi hér og flytja þurfi til heimalandsins.

„Bæði ferðamenn sem hafa komið sérstaklega hingað til landsins og svo ýmist ferðamenn sem hafa verið á flugi yfir landinu eða á skemmtiferðarskipum við nágrenni landsins og hafa verið fluttir veikir með þyrlum til landsins og látist hér,“ segir Elín Sigrún.

Það færist í aukana að eldra fólk deyi hér á landi enda ferðist fleiri eldri borgarar til landsins en áður, sérstaklega frá Þýskalandi. Það sé áberandi fjölgun í dauðsföllum útlendinga en verið hefur á undanförnum árum. Meirihluti þeirra sem deyi á íslandi séu brenndir en aðrir fluttir til heimalandsins í kistum.

Íslendingar deyja auðvitað líka á ferðalögum í útlöndum.

„Já en það er nú töluvert færra, sem betur fer,“ segir Elín Sigrún. Sennilega innan við tíu á þessu ári.