"Það þarf tvo til að semja“

Kristján Þór Júlíusson heilbrigðisráðherra segir mikilvægt að kjör lækna verði samkeppnishæf við erlenda markaði. Þó þurfi að hafa í huga að kröfur þeirra þurfi að hafa samhljóm meðal annarra stétta sem einnig gera kröfur til sama launagreiðanda, í þessu tilfelli ríkinu. „Það þarf tvo til að semja,“ sagði Kristján á Alþingi í dag.

Ögmundur Jónasson, þingmaður og fyrrverandi heilbrigðisráðherra, skoraði á deiluaðila að ná samningum hið allra fyrsta.

„Ég skora á lækna og ríkisstjórnina að ná samningum hið allra fyrsta. Ég hef fært rök fyrir því hvers vegna ábyrgðin hvílir fremur á ríkisstjórninni og okkur sem höldum, og höfum haldið utan um fjárveitingavaldið hér á Íslandi til að leysa þessa deilu. Ég held að þjóðin vilji það,“ sagði Ögmundur.

Mikill samhljómur var á meðal þeirra sem til máls tóku og bentu flestir á að kjör lækna þurfi að vera sambærileg við það sem gerist í nágrannalöndum til að tryggja góða heilbrigðisþjónustu hér á landi. Ögmundur benti á að hætta sé á flótta lækna úr opinbera heilbrigðiskerfinu yfir í einkarekstur í ljósi versnandi kjara.

„Um síðustu áramót var samið við sjálfstætt starfandi lækna og kjör þeirra hækkuð um 20%. Þar með er verið að setja hvata inn í kerfið að fólk úr almennu stofnununum leiti í einkarekstur. Ég spyr hæstvirtan ráðherra hvort þetta sé gert með ráðnum hug,“ sagði Ögmundur.

Kristján Þórs sagði það þó ekki rétt, kjör lækna hefðu hækkað um 3-4 prósent. „Þetta er alrangt og stafar örugglega að hluta til af því að við höfum ekki getað skýrt hvað þar var í gangi,“ sagði Kristján.

Sérgreinalæknar hafi verið samningslausir frá árinu 2010 til 2013 og því hafi þeir búið til komugjald sem velt var yfir á sjúklinga til að halda í við kostnaðarhækkun þess tíma. Við samninginn sem gerður var við sérgreinalækna undir lok árs 2013 hafi þetta komugjald og þessi kostnaður sjúklinga verið felldur niður.  Kostnaðarhlutdeild sjúklinga í sérlæknaskostnaði lækkaði því úr 42 prósentum í 30 prósent.

„Það er, greiðslur sjúklinga í íslenska heilbrigðiskerfinu lækkuðu um hátt í milljarð við þennan samning. Við höfum ekki getað komið þessu fram. Mér er fullljóst að aðilar vinnumarkaðarins og sjúklingasamtökin hafa orðið vör við þessa breytingu, en hún er ekki rædd.“