Borgarbúum boðið í fræðslugöngu á Hverfisgötu

Reykjavíkurborg býður borgarbúum í fræðslugöngu með Guðjóni Friðrikssyni sagnfræðingi og Hjálmari Sveinssyni formanni umhverfis- og skipulagsráðs en þetta kemur fram í tilkynningu frá Reykjavíkurborg.

Gangan hefst við Safnahúsið klukkan 13:00 á morgun, laugardaginn 8. nóvember, og henni lýkur við Snorrabraut eða Hverfisgötu 105 þar sem Dagur B. Eggertsson borgarstjóri opnar formlega endurgerð götukaflans frá Vitastíg að Snorrabraut. Hverfisgatan hefur nú verið endurnýjuð frá Klapparstíg að Snorrabraut.

Hverfisgatan í Reykjavík á sér langa sögu en hún var upphaflega aðalstígurinn í Skuggahverfi, gatan í hverfinu. Hún lengdist með árunum til vesturs og austurs. Gatan hefur gengið í gegnum margar breytingar og nú hefur hún verið endurnýjuð í samræmi við hjólreiðaáætlun Reykjavíkurborgar.

Saga Hverfisgötu er mjög áhugaverð, nefna má að stungið var upp á því að gatan héti Leggjabrjótur sökum þess hve illfær hún þótti. Fyrsta gangstétt bæjarins var lög úr steinlímdum hellum upp Hverfisgötu og hún var einnig fyrsta gatan sem var malbikuð austan við Læk.

Segja má að Hverfisgatan sé einnig með fyrstu götum borgarinnar sem er endurnýjuð í samræmi við leiðarljós sem tryggja öruggar, skilvirkar, þægilegar og vistvænar samgöngur fyrir alla.