Stelast inn á íslenskar vefmyndavélar: Streyma myndum um allan heim

Ónafngreindir aðilar hafa birt myndir úr um 73 þúsund vefmyndavélum á netinu. Nokkrar myndavélanna eru staðsettar á Íslandi. Myndavélarnar eru staðsettar á hinum ýmsu stöðu, allt frá bílastæðum til svefnherbergja.

Vefurinn, sem heitir Insecam, birtir myndir úr fjórtán vefmyndavélum sem staðsettar eru hér á landi. Auðvelt er að finna þær vélar á síðunni en þar eru allar myndavélarnar flokkaðar eftir því í hvaða landi þær eru staðsettar. Bandaríska vefsíðan Gizmodo fjallar um málið í dag.

Um er að ræða myndir úr nettengdum myndavélum þar sem notendurnir hafa ekki breytt sjálfgefnum lykilorðum vélanna. Á vefsíðunni segir að hún hafi verið sett upp til að vekja athygli á mikilvægi þess á að notendur hugi að öryggisstillingum. Það er þó varla eina ástæðan því auglýsingar eru seldar á síðunni og því líklegt að hagnaður sé af rekstri hennar.

Langflestar myndavélarnar eru staðsettar í Bandaríkjunum, eða rúmlega ellefu þúsund talsins. Tæplega sjö þúsund eru skráðar í Suður-Kóreu, tæplega fimm þúsuund í Kína, og rúmlega þrjú þúsund í Mexíkó. Alls eru myndavélar frá 256 mismunandi löndum.

Auðvelt er að koma í veg fyrir að vefurinn geti tengst við myndavélar. Nóg er að breyta lykilorðinu að þeim.