Kom að ókunnugum manni í baði heima hjá sér

Íbúa í umdæmi lögreglunnar á Suðurnesjum brá heldur en ekki í brún þegar hann kom heim til sín í vikunni en inni í íbúð hans var ókunnugur maður í baði.

Íbúinn hafði skilið íbúð sína eftir opna og mannlausa og því fór sem fór.

Hinn óvænti gestur reyndist hafa ruglast á íbúðum í viðkomandi fjölbýlishúsi auk þess sem hann hafði innbyrt vímuefni og var þar af leiðandi ruglaður í ríminu.

Var tekin ákvörðun um að flytja hann á Heilbrigðisstofnun Suðurnesja til rannsóknar.