Tilboð til lausnar kjaradeilu í Kópavogi

Bæjarstjórinn í Kópavogi, Ármann Kr. Ólafsson, hefur óskað eftir því að samninganefnd Sambands íslenskra sveitarfélaga f.h. Kópavogsbæjar leggi fram tilboð til lausnar kjaradeilu við Starfsmannafélag Kópavogsbæjar.

Í tilkynningu frá Kópavogsbæ kemur fram að tilboðið feli í sér:

a) Aðilar samþykki kjarasamning sem Samband íslenskra sveitarfélaga hefur gert við önnur bæjarstarfsmannafélög í landinu en með gildistíma frá 1. október 2014.

b) Að auki greiðir Kópavogsbær 105.000 króna eingreiðslu til starfsmanna sem tekur m.a. mið af styttri gildistíma samnings. Með þessu er þeim lægst launuðu tryggð hlutfallsleg mest hækkun.

c) Að auki tryggir Kópavogsbær ófaglærðum starfsmönnum á leikskólum sömu kjör og ófaglærðir á leikskólum Reykjavíkurborgar njóta út samningstímann, en þessi störf voru þau einu sem voru lægra borguð í samanburði milli sveitarfélaganna.

d) Að sérákvæði um háskólamenntaða falli brott við lok samningstíma.

e) Að Kópavogsbær skipi fulltrúa í stjórn Vísindasjóðs Starfsmannafélagsins.

„Með tilboðinu er vonast til að deilan leysist áður en boðað verkfall hefst nk. mánudag. Tilboðið verður formlega lagt fram á fundi sem ríkissáttasemjari hefur boðað til á morgun, laugardag,“ segir í tilkynningunni.