Drengirnir rata ekki heim til „afa feita“

Rannsókn kynferðisbrotadeildar lögreglunnar á meintum barnaníðingi stendur yfir. Búið er að kæra manninn út af tveimur brotaþolum, fimm ára gömlum vinum. Maðurinn á að hafa boðið drengjunum heim til sín með loforðum um sælgæti og teiknimyndir. Á hann að hafa sýnt drengjunum kynfæri sín. Drengirnir tala um manninn sem „afa feita“.

Kristján Ingi Kristjánsson, yfirlögregluþjónn hjá lögreglunni á höfuðborgarsvæðinu, segir í samtali við Vísi að enn liggi ekki ljóst fyrir hver hafi átt í hlut.

„Það er ágætt að nota tækifærið og hvetja almenning ,sem hefur upplýsingar um hver afi feiti sé, að koma því á framfæri við lögregluna,“ segir Kristján og minnir á síma lögreglunnar, 444-1000 og Fésbókarsíðu lögreglunnar.

Björn Einarsson, faðir annars drengsins og körfuboltaþjálfari í Keflavík, sagði í samtali við Vísi á föstudagskvöldið vonast til þess að lögreglan hefði uppi á manninum á undan sér. Sonur hans segðist ekki muna hvar maðurinn ætti heima vegna hræðslu.

Rætt hefur verið við ungu drengina í Barnahúsi og gerð tilraun til þess að komast að því hvar „afi feiti“ eigi heima. Drengirnir rata hins vegar ekki á staðinn að sögn Kristjáns Inga.

Talið var að drengirnir hefðu farið endurtekið heim til mannsins. Kristján Ingi ítrekar að ung börn eigi auðvitað ekki að vera eftirlitslaus. Hins vegar sé býsna algengt og vel þekkt að börn leiti aftur til þeirra sem brjóti gegn þeim.